ಬೆಳಗಾವಿಯಲ್ಲಿ ಸ್ಟಾರ್ ಏರ್ ವಿಮಾನದ ತುರ್ತು ಭೂಸ್ಪರ್ಶ – 48 ಪ್ರಯಾಣಿಕರು ಸುರಕ್ಷಿತ
ಬೆಳಗಾವಿ, ಆಗಸ್ಟ್ 16 – ಬೆಳಗಾವಿಯಿಂದ ಮುಂಬೈಗೆ ಹೊರಟಿದ್ದ ಸ್ಟಾರ್ ಏರ್ ವಿಮಾನದಲ್ಲಿ ಅಕಸ್ಮಾತ್ ತಾಂತ್ರಿಕ ದೋಷ ಉಂಟಾದ ಹಿನ್ನೆಲೆಯಲ್ಲಿ ಶನಿವಾರ ಬೆಳಿಗ್ಗೆ ತುರ್ತು ಭೂಸ್ಪರ್ಶ ಮಾಡಬೇಕಾದ ಪರಿಸ್ಥಿತಿ ಎದುರಾಯಿತು. ಪೈಲೆಟ್‌ ಸಮಯಪ್ರಜ್ಞೆ ಮತ್ತು ತ್ವರಿತ ನಿರ್ಧಾರದ ಫಲವಾಗಿ ವಿಮಾನದಲ್ಲಿದ್ದ 48 ಮಂದಿ ಪ್ರಯಾಣಿಕರು ಯಾವುದೇ ಅನಾಹುತವಿಲ್ಲದೆ ಸುರಕ್ಷಿತವಾಗಿ ಇಳಿದರು.
ಬೆಳಿಗ್ಗೆ 7.50ಕ್ಕೆ ಬೆಳಗಾವಿಯಿಂದ ಮುಂಬೈ ಕಡೆಗೆ ಹೊರಟಿದ್ದ ಈ ವಿಮಾನ ಟೇಕ್ಆಫ್ ಆದ ಕೆಲವೇ ಹೊತ್ತಿನಲ್ಲಿ ಎಂಜಿನ್ನಲ್ಲಿ ತೊಂದರೆ ಕಾಣಿಸಿಕೊಂಡಿತು. ತಕ್ಷಣ ಪೈಲಟ್ ವಿಮಾನವನ್ನು ಹಿಮ್ಮುಖವಾಗಿ ತಿರುಗಿಸಿ ಕೇವಲ 15 ನಿಮಿಷಗಳಲ್ಲಿ ಬೆಳಗಾವಿ ವಿಮಾನ ನಿಲ್ದಾಣದಲ್ಲಿ ತುರ್ತು ಭೂಸ್ಪರ್ಶ ಮಾಡಿಸಿದರು. ಪ್ರಯಾಣಿಕರು ಆತಂಕಗೊಂಡಿದ್ದರೂ, ಪೈಲಟ್ನ ಧೈರ್ಯ ಮತ್ತು ಸಮರ್ಪಕ ನಿರ್ಧಾರದಿಂದ ಎಲ್ಲರೂ ಸುರಕ್ಷಿತರಾದರು.
ವಿಮಾನ ನಿಲ್ದಾಣದ ಪ್ರತಿಕ್ರಿಯೆ
ಈ ಕುರಿತು ಬೆಳಗಾವಿ ವಿಮಾನ ನಿಲ್ದಾಣದ ವ್ಯವಸ್ಥಾಪಕ ನಿರ್ದೇಶಕ ತ್ಯಾಗರಾಜನ್ ಹೇಳಿದರು:
“ಸ್ಟಾರ್ ಏರ್ ವಿಮಾನವು ಬೇಗನೆ ತಾಂತ್ರಿಕ ಸಮಸ್ಯೆಯಿಂದ ಮರುಭೂಸ್ಪರ್ಶ ಮಾಡಬೇಕಾಯಿತು. ತಕ್ಷಣ ಇಂಜಿನಿಯರ್ಗಳನ್ನು ಕರೆಸಿ ವಿಮಾನದ ತಪಾಸಣೆ ಪ್ರಾರಂಭಿಸಲಾಗಿದೆ. ಅಷ್ಟರಲ್ಲಿ ಪ್ರಯಾಣಿಕರಿಗಾಗಿ ಬೇರೆ ವಿಮಾನದ ವ್ಯವಸ್ಥೆ ಮಾಡಲಾಗಿದೆ. ಬೆಂಗಳೂರಿನಿಂದ ಬಂದ ಇನ್ನೊಂದು ವಿಮಾನದ ಮೂಲಕ ಪ್ರಯಾಣಿಕರು ಮುಂಬೈಗೆ ತೆರಳಿದ್ದಾರೆ. ಕೆಲವರು ತಮ್ಮ ಟಿಕೆಟ್ಗಳನ್ನು ರದ್ದು ಮಾಡಿದ್ದರು, ಉಳಿದವರು ತಕ್ಷಣವೇ ಪ್ರಯಾಣ ಮುಂದುವರಿಸಿದರು,” ಎಂದು ವಿವರಿಸಿದರು.
ಪ್ರಯಾಣಿಕರ ಅನುಭವ
ಘಟನೆ ವೇಳೆ ಪ್ರಯಾಣಿಸುತ್ತಿದ್ದ ದಂಪತಿ ಗಂಗಾ ಪವಾರ್ ಮತ್ತು ಶ್ರೀನಿವಾಸ ಪವಾರ್ ಹೀಗೆ ಹೇಳಿದರು:
“ವಿಮಾನ ಬೆಳಿಗ್ಗೆ 7.50ಕ್ಕೆ ಹಾರಾಟ ಆರಂಭಿಸಿತು. ಆದರೆ ಕೆಲವೇ ಹೊತ್ತಿನಲ್ಲಿ ಅದು ಏಕಾಏಕಿ ತಿರುಗಿತು. ಆ ಕ್ಷಣದಲ್ಲಿ ಎಲ್ಲರಿಗೂ ಭಯ ಬಂತು. ನಂತರ ಪೈಲಟ್ ಘೋಷಣೆ ಮಾಡಿ – ವಿಮಾನದಲ್ಲಿ ತಾಂತ್ರಿಕ ಸಮಸ್ಯೆ ಉಂಟಾಗಿದೆ, ಅದಕ್ಕಾಗಿ ಮತ್ತೆ ಬೆಳಗಾವಿಯಲ್ಲಿ ತುರ್ತು ಭೂಸ್ಪರ್ಶ ಮಾಡುತ್ತಿದ್ದೇವೆ’ ಎಂದರು. ಆ ಘೋಷಣೆ ಕೇಳಿ ನಮಗೆ ಅಹಮದಾಬಾದ್ ಘಟನೆಯ ನೆನಪು ತಕ್ಷಣ ಬಂತು. ಅದೃಷ್ಟವಶಾತ್ ನಾವು ಎಲ್ಲರೂ ಸುರಕ್ಷಿತವಾಗಿದ್ದೇವೆ. ಆದರೆ ನಮ್ಮ ಧಾರ್ಮಿಕ ಯಾತ್ರೆ ವಿಳಂಬವಾಯಿತು. ಇಂದು ದ್ವಾರಕೆಯಲ್ಲಿ ಕೃಷ್ಣದರ್ಶನ ಪಡೆಯಬೇಕಾಗಿತ್ತು, ಈಗ ಸಮಯ ಮತ್ತು ಹಣ ಎರಡರಲ್ಲೂ ನಷ್ಟ ಉಂಟಾಗಿದೆ,” ಎಂದು ತಿಳಿಸಿದ್ದಾರೆ.
ತನಿಖೆ ಪ್ರಗತಿಯಲ್ಲಿದೆ
ಸ್ಟಾರ್ ಏರ್ ಸಂಸ್ಥೆ ತಾಂತ್ರಿಕ ದೋಷದ ಮೂಲ ಕಾರಣ ಪತ್ತೆಹಚ್ಚಲು ತನಿಖೆ ಆರಂಭಿಸಿದೆ. ವಿಮಾನವನ್ನು ಇಂಜಿನಿಯರ್ಗಳ ತಂಡವೊಂದು ಪರಿಶೀಲಿಸುತ್ತಿದ್ದು, ಸಮಸ್ಯೆ ಪರಿಹಾರವಾಗುವವರೆಗೆ ಅದನ್ನು ಮತ್ತೆ ಸೇವೆಗೆ ಬಿಡುವುದಿಲ್ಲ ಎಂದು ತಿಳಿಸಿದೆ.
