ಬೆಂಗಳೂರು: ನಗರದ ಹೆಸರುಘಟ್ಟ ರಸ್ತೆಯ ಸಮೀಪದ ಸೋಲದೇವನಹಳ್ಳಿಯಲ್ಲಿರುವ ಒಂದು ಖಾಸಗಿ ಪಿಜಿಯಲ್ಲಿ ದುರಂತ ಘಟನೆ ನಡೆದಿದೆ. ಅಂತಿಮ ವರ್ಷದ ಬಿ.ಫಾರ್ಮ್ ಪದವಿ ಓದುತ್ತಿದ್ದ ವತ್ಸಲಾ (19) ಎಂಬ ವಿದ್ಯಾರ್ಥಿನಿ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ಭಾನುವಾರ ಬೆಳಿಗ್ಗೆ ಬೆಳಕಿಗೆ ಬಂದಿದೆ. ವತ್ಸಲಾ ಹಾಸನ ಜಿಲ್ಲೆಯವರಾಗಿದ್ದು, ಉನ್ನತ ವಿದ್ಯಾಭ್ಯಾಸದ ಉದ್ದೇಶದಿಂದ ಬೆಂಗಳೂರಿಗೆ ಬಂದು, ಸೋಲದೇವನಹಳ್ಳಿಯ ಪಿಜಿಯಲ್ಲಿ ವಾಸಿಸುತ್ತಿದ್ದರು.
ಭಾನುವಾರ ಬೆಳಗ್ಗೆಯಿಂದಲೇ ವತ್ಸಲಾ ತಮ್ಮ ಕೊಠಡಿಯನ್ನು ತೆರೆಯದೇ ಇದ್ದದ್ದು ಪಿಜಿ ಸಿಬ್ಬಂದಿಗಳ ಗಮನಕ್ಕೆ ಬಂದರೂ, ಅವರು ಮಧ್ಯಾಹ್ನದವರೆಗೂ ಅದನ್ನು ಹೆಚ್ಚು ಗಂಭೀರವಾಗಿ ತೆಗೆದುಕೊಂಡಿರಲಿಲ್ಲ. ಆದರೆ ಮದ್ಯನ 2:30ರ ಸುಮಾರಿಗೆ ಕೊಠಡಿಯ ಬಾಗಿಲು ಹೊರಗಿನಿಂದಲೇ ಲಾಕ್ ಆಗಿರುವುದನ್ನು ಕಂಡು, ಸಿಬ್ಬಂದಿಗೆ ಅನುಮಾನ ತಲೆದೋರಿತು. ತಕ್ಷಣ ಅವರು ಬಾಗಿಲನ್ನು ಒಡೆದು ಒಳಗೆ ಪ್ರವೇಶಿಸಿದಾಗ, ವತ್ಸಲಾ ಫ್ಯಾನ್ಗೆ ನೇಣು ಬಿಗಿದುಕೊಂಡಿರುವ ಭಯಾನಕ ದೃಶ್ಯ ಕಣ್ಣುಮುಂದೆ ಬಂತು. ತಕ್ಷಣವೇ ಪೊಲೀಸರಿಗೆ ಮಾಹಿತಿ ನೀಡಲಾಯಿತು.
ಸೋಲದೇವನಹಳ್ಳಿ ಠಾಣೆ ಪೊಲೀಸರು ಸ್ಥಳಕ್ಕೆ ಆಗಮಿಸಿ ಪರಿಶೀಲನೆ ನಡೆಸಿದಾಗ, ವತ್ಸಲಾ ಬರೆದಿದ್ದ ಎಂಟು ಪುಟಗಳ ಉದ್ದದ ‘ಡೆತ್ ನೋಟ್’ ಪತ್ತೆಯಾಯಿತು. ಆ ಪತ್ರದಲ್ಲಿ ತಂದೆಯ ಬಗ್ಗೆ ಆಕೆ ಹೊಂದಿದ್ದ ಗಂಭೀರ ಗೌರವ, ಅವರು ನೀಡಿದ ಪ್ರೀತಿ, ಸಾಕ್ಷರತೆ ಹಾಗೂ ಬೆಂಬಲವನ್ನು ಕುರಿತು ಕೃತಜ್ಞತೆಯಿಂದ ಬರೆದ ಸಾಲುಗಳು ಕಂಡುಬಂದವು. “ನಾನು ನಿಮ್ಮ ಪ್ರೀತಿಗೆ ಅರ್ಹಳಲ್ಲ ಅಪ್ಪ. ನೀವು ಕೊಟ್ಟಿರುವ ಪ್ರೀತಿಯನ್ನು ಇನ್ಯಾರೂ ಕೊಡಲು ಸಾಧ್ಯವಿಲ್ಲ. ಕೇಳಿದ್ದನ್ನೆಲ್ಲಾ ಕೊಡಿಸಿದ್ದೀರಿ. ಅಪ್ಪನ ಮರ್ಯಾದೆಗೆ ಧಕ್ಕೆ ಉಂಟಾಗುವಂತಹ ತಪ್ಪನ್ನು ನಾನು ಮಾಡಿಲ್ಲ. ಅಪ್ಪ ನಿಮ್ಮ ಪ್ರೀತಿಯನ್ನು ಉಳಿಸಿಕೊಂಡು ಹೋಗುವ ಭಾಗ್ಯ ನನಗಿಲ್ಲ,” ಎಂದು ಪತ್ರ ಆರಂಭವಾಗಿದ್ದು, ನಂತರ ತನ್ನ ವ್ಯಕ್ತಿಗತ ಸಂಬಂಧಗಳ ಕಹಿ ಮತ್ತು ತಾನು ಪ್ರೀತಿಸಿದ ಹುಡುಗನಿಗೆ ಮೋಸ ಮಾಡುವಂತಾಗಬಾರದೇಂಬ ಆತಂಕವನ್ನು ಬರೆದುಕೊಂಡಿದ್ದಳು. ಈ ಕಾರಣಗಳಿಂದಲೇ ತಾನು ಜೀವ ತ್ಯಾಗಕ್ಕೆ ಶರಣಾಗುತ್ತಿದ್ದೇನೆಂದು ವತ್ಸಲಾ ಸ್ಪಷ್ಟವಾಗಿ ಬರೆದಿದ್ದಾಳೆ.
ವೈಯಕ್ತಿಕ ಸಂಬಂಧಗಳಿಂದ ಉಂಟಾದ ಮಾನಸಿಕ ಒತ್ತಡವೇ ಈ ಆತ್ಮಹತ್ಯೆಗೆ ಕಾರಣವಾಗಿರಬಹುದೇ ಎಂಬ ಅನುಮಾನಗಳು ಈ ಪತ್ರದ ಮೂಲಕ ಹೊರಬಿದ್ದಿವೆ. ಪೊಲೀಸರು ಪ್ರಕರಣವನ್ನು ಯುಡಿಆರ್ (UDR) ಆಗಿ ದಾಖಲಿಸಿ, ಡೆತ್ ನೋಟ್ ಅನ್ನು ವಶಪಡಿಸಿಕೊಂಡಿದ್ದಾರೆ. ವತ್ಸಲಾರ ಮೃತ ದೇಹವನ್ನು ಮರಣೋತ್ತರ ಪರೀಕ್ಷೆಗಾಗಿ ವಿಕ್ಟೋರಿಯಾ ಆಸ್ಪತ್ರೆಗೆ ಕಳುಹಿಸಲಾಗಿದೆ.
ತನಿಖಾಧಿಕಾರಿಗಳು ವತ್ಸಲಾರ ಕುಟುಂಬ ಸದಸ್ಯರು, ಸ್ನೇಹಿತರು ಹಾಗೂ ಕಾಲೇಜಿನ ಶಿಕ್ಷಕರೊಂದಿಗೆ ಮಾತನಾಡಿ, ಘಟನೆಯ ಮೂಲ ಕಾರಣವನ್ನು ಅರಿಯಲು ಪ್ರಯತ್ನಿಸುತ್ತಿದ್ದಾರೆ. ವಿದ್ಯಾರ್ಥಿನಿಯ ಬದುಕಿನಲ್ಲಿ ಏನಾದರೂ ಒತ್ತಡ, ನೋವು, ಅಥವಾ ಸಮಸ್ಯೆಗಳು ಎದುರಾಗಿದ್ದವೆಯೇ? ಎಂಬುದರ ಕುರಿತು ಪೊಲೀಸರು ಆಳವಾದ ತನಿಖೆ ಮುಂದುವರೆಸಿದ್ದಾರೆ.
