ಬೆಂಗಳೂರು, ನವೆಂಬರ್ 03: ಮಾನವೀಯತೆಯ ಮಿತಿಯನ್ನು ಮೀರಿ ನಡೆದಿರುವ ಹೀನಕೃತ್ಯವೊಂದು ಬೆಳಕಿಗೆ ಬಂದಿದೆ. ಖಾಸಗಿ ಅಂಗಕ್ಕೆ ಹಲ್ಲೆ ನಡೆದ ಪರಿಣಾಮ ಮಲ, ಮೂತ್ರ ವಿಸರ್ಜನೆ ಮಾಡಲು ಸಹ ಸಾಧ್ಯವಾಗದೆ ನರಕಯಾತನೆ ಅನುಭವಿಸುವಂತಾಗಿರುವ ಮಹಿಳೆ ವರ್ತೂರು ಪೊಲೀಸ್ ಠಾಣೆಯ ಅಧಿಕಾರಿಗಳ ವಿರುದ್ಧ ಗಂಭೀರ ಆರೋಪ ಮಾಡಿದ್ದಾರೆ. ಈ ಪ್ರಕರಣವು ಪೊಲೀಸರ ಕ್ರೌರ್ಯ ಮತ್ತು ದೌರ್ಜನ್ಯಕ್ಕೆ ಮತ್ತೊಮ್ಮೆ ಬೆಳಕು ಚೆಲ್ಲಿದೆ.
34 ವರ್ಷದ ಸುಂದರಿ ಬಿಬಿ ಎಂಬ ಯುವತಿ ಈ ಹೀನ ಕೃತ್ಯದ ಬಲಿಯಾಗಿದ್ದು, ಬೌರಿಂಗ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ವೈದ್ಯಕೀಯ ಪರೀಕ್ಷೆ (ಎಂಎಲ್‌ಸಿ ರಿಪೋರ್ಟ್‌)ಯಲ್ಲಿ ಅವರ ಗಾಯಗಳ ಭೀಕರತೆಯ ಕುರಿತು ಸ್ಪಷ್ಟ ಉಲ್ಲೇಖವಿದ್ದು, ಹಲ್ಲೆಯಿಂದಾಗಿ ಆಕೆಯ ದೈಹಿಕ ಸ್ಥಿತಿ ಗಂಭೀರವಾಗಿದ್ದೆಂದು ವೈದ್ಯರು ದೃಢಪಡಿಸಿದ್ದಾರೆ. ಸದ್ಯ ವೈದ್ಯರ ತೀವ್ರ ಚಿಕಿತ್ಸೆಯ ಬಳಿಕ ಆಕೆ ನಿಧಾನವಾಗಿ ಚೇತರಿಸಿಕೊಳ್ಳುತ್ತಿದ್ದಾರೆ.
ಘಟನೆಯ ಹಿನ್ನೆಲೆ ಹೀಗೆ ಇದೆ — ಸುಂದರಿ ಬಿಬಿ ಬೆಂಗಳೂರಿನ ಖಾಸಗಿ ಅಪಾರ್ಟ್‌ಮೆಂಟ್‌ನಲ್ಲಿ ಗೃಹಕಾರ್ಮಿಕಳಾಗಿ ಕೆಲಸ ಮಾಡುತ್ತಿದ್ದರು. ಅಲ್ಲಿನ ಫ್ಲ್ಯಾಟ್ ಮಾಲೀಕರು ಅವರ ವಿರುದ್ಧ ಕಳ್ಳತನ ಆರೋಪ ಮಾಡಿದ್ದು, ನಂತರ ವರ್ತೂರು ಪೊಲೀಸ್ ಠಾಣೆಗೆ ದೂರು ಸಲ್ಲಿಸಿದ್ದರು. ವಿಚಾರಣೆಗೆಂದು ಕರೆಸಿಕೊಂಡ ಪೊಲೀಸರೇ ಆಕೆಯ ಮೇಲೆ ಅತಿಕ್ರೂರ ರೀತಿಯಲ್ಲಿ ಹಲ್ಲೆ ನಡೆಸಿದ್ದಾರೆಂಬ ಆರೋಪ ಕೇಳಿಬಂದಿದೆ.
ಆಕೆಯ ಹೇಳಿಕೆಯಲ್ಲಿ — “ಪೊಲೀಸರು ವಿಚಾರಣೆ ವೇಳೆ ನನಗೆ ಅವಾಚ್ಯ ಶಬ್ದಗಳಿಂದ ಬೈದು, ಖಾಸಗಿ ಅಂಗಕ್ಕೆ ಹಾಗೂ ಕೈಕಾಲು, ತಲೆಯ ಭಾಗಕ್ಕೆ ಬರ್ಬರ ಹಲ್ಲೆ ಮಾಡಿದರು. ನನ್ನ ಮೇಲೆ ಕಳ್ಳತನದ ಸುಳ್ಳು ಆರೋಪವನ್ನೇ ನಂಬಿ ಶಾರೀರಿಕವಾಗಿ ಹಿಂಸೆಗೊಳಪಡಿಸಿದರು,” — ಎಂದು ಹೇಳಲಾಗಿದೆ.
