ಬಿಎಂಟಿಸಿ ಬಸ್‌ಗಳಿಗೆ ಅಮಾಯಕರ ಬಲಿ – ನಿರ್ಲಕ್ಷ್ಯ ಚಾಲನೆಗೆ ಸಾರ್ವಜನಿಕರ ಕಳವಳ
ಬೆಂಗಳೂರು, ಆಗಸ್ಟ್ 22: ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ದಿನನಿತ್ಯ ಸಾವಿರಾರು ಜನರು ತಮ್ಮ ಸಂಚಾರಕ್ಕಾಗಿ ಬಿಎಂಟಿಸಿ ಬಸ್‌ಗಳನ್ನು ಅವಲಂಬಿಸುತ್ತಾರೆ. ಆದರೆ ಈ ಬಸ್‌ಗಳು ಸಾರ್ವಜನಿಕ ಸಾರಿಗೆಯ ನಂಬಿಕೆಯಾದರೂ, ಇತ್ತೀಚಿನ ವರ್ಷಗಳಲ್ಲಿ ಬಸ್‌ಗಳಿಂದ ಸಂಭವಿಸುತ್ತಿರುವ ಅಪಘಾತಗಳ ಪ್ರಮಾಣ ಆತಂಕಕಾರಿ ಮಟ್ಟಕ್ಕೆ ಏರಿದೆ. ಒಂದಿಲ್ಲೊಂದು ನಿರ್ಲಕ್ಷ್ಯ, ಚಾಲಕರ ಅತಿವೇಗ ಹಾಗೂ ನಿಯಂತ್ರಣ ಕಳೆದುಕೊಳ್ಳುವ ಘಟನೆಗಳಿಂದ ಅಮಾಯಕರ ಜೀವಗಳು ಕಳೆದುಹೋಗುತ್ತಿವೆ.
ಕೇವಲ ಕಳೆದ ಒಂದು ವಾರದಲ್ಲಿ ನಾಲ್ಕು ಜನರು ಬಿಎಂಟಿಸಿ ಬಸ್‌ಗಳಿಂದ ಸಾವನ್ನಪ್ಪಿದ್ದಾರೆ. ವಿಶೇಷವಾಗಿ ಎಲೆಕ್ಟ್ರಿಕ್ ಬಸ್‌ಗಳು ಹೆಚ್ಚು ಅಪಘಾತಗಳಿಗೆ ಕಾರಣವಾಗುತ್ತಿದ್ದು, ಕಳೆದ 15 ತಿಂಗಳಲ್ಲಿ ಮಾತ್ರ 18 ಮಂದಿ ದುರ್ಘಟನೆಯಲ್ಲಿ ಬಲಿಯಾಗಿದ್ದಾರೆ. ಇಂತಹ ಅಪಘಾತಗಳ ಸರಣಿ ಜನರಲ್ಲಿ ಬಿಎಂಟಿಸಿ ನಿರ್ವಹಣೆ ಮತ್ತು ಸುರಕ್ಷತಾ ಕ್ರಮಗಳ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಎಬ್ಬಿಸಿದೆ.
ಎಲೆಕ್ಟ್ರಿಕ್ ಬಸ್‌ಗಳೇ ಹೆಚ್ಚು ಅಪಾಯಕಾರಿಗಳು?
ಇತ್ತೀಚಿನ ಅವಘಡಗಳಲ್ಲಿ ಎಲೆಕ್ಟ್ರಿಕ್ ಬಸ್‌ಗಳು ಪ್ರಮುಖ ಪಾತ್ರವಹಿಸಿರುವುದು ಗಮನಾರ್ಹ. ಕೆಲ ದಿನಗಳ ಹಿಂದೆ ಜಯನಗರದಲ್ಲಿ ಎಲೆಕ್ಟ್ರಿಕ್ ಬಸ್‌ನಿಂದ ಬಿದ್ದು ವೃದ್ಧ ವ್ಯಕ್ತಿ ಸಾವನ್ನಪ್ಪಿದ ಘಟನೆ ಸಂಭವಿಸಿತ್ತು. ಅದಕ್ಕೂ ಮೊದಲು ಜುಲೈ 30ರಂದು ಮಡಿವಾಳದಲ್ಲಿ ಮತ್ತೊಬ್ಬ ವೃದ್ಧೆ ಎಲೆಕ್ಟ್ರಿಕ್ ಬಸ್‌ಗೆ ಸಿಲುಕಿ ಪ್ರಾಣ ಕಳೆದುಕೊಂಡಿದ್ದರು. ಇವು ಕೇವಲ ಉದಾಹರಣೆಗಳು ಮಾತ್ರ. ಕಳೆದ 15 ತಿಂಗಳಲ್ಲಿ ಒಟ್ಟು 18 ಮಂದಿ ಎಲೆಕ್ಟ್ರಿಕ್ ಬಸ್ ಅಪಘಾತಗಳಲ್ಲಿ ಮೃತರಾಗಿದ್ದಾರೆ.
ಚಾಲಕರ ನಿರ್ಲಕ್ಷ್ಯ – ಅತಿವೇಗ ಆರೋಪ
ಬಿಎಂಟಿಸಿ ಬಸ್‌ಗಳ ಚಾಲಕರ ಮೇಲೆ ಅತಿವೇಗ, ನಿರ್ಲಕ್ಷ್ಯದಿಂದ ಬಸ್‌ಗಳನ್ನು ಚಲಾಯಿಸುತ್ತಾರೆ ಎಂಬ ಗಂಭೀರ ಆರೋಪಗಳು ಕೇಳಿಬರುತ್ತಿವೆ. ವಿಶೇಷವಾಗಿ ಎಲೆಕ್ಟ್ರಿಕ್ ಬಸ್‌ಗಳ ಚಾಲಕರು ಖಾಸಗಿ ಡ್ರೈವರ್‌ಗಳಾಗಿರುವುದರಿಂದ ನಿಯಂತ್ರಣ ಮತ್ತು ಜವಾಬ್ದಾರಿತನದ ಕೊರತೆಯಿದೆ ಎಂಬ ಟೀಕೆಗಳು ವ್ಯಕ್ತವಾಗುತ್ತಿವೆ. ಸಂಚಾರಿ ಪೊಲೀಸರು ನಿರಂತರವಾಗಿ ಬಸ್ ಚಾಲಕರಿಗೆ ಸುರಕ್ಷತಾ ಕ್ರಮಗಳ ಕುರಿತು ತರಬೇತಿ ನೀಡಿದರೂ, ಪ್ರಾಣಹಾನಿ ತಡೆಯುವಲ್ಲಿ ಯಶಸ್ಸು ಕಾಣುತ್ತಿಲ್ಲ.
ಶಾಲಾ ಬಾಲಕಿಯ ದುರ್ಮರಣ – ಅಮ್ಮನ ಅಳಲು
ಇತ್ತೀಚಿನ ಘಟನೆಗಳಲ್ಲಿ ಅತ್ಯಂತ ಹೃದಯವಿದ್ರಾವಕವಾದುದು, ಶಾಲೆಗೆ ಹೋಗುತ್ತಿದ್ದ 10 ವರ್ಷದ ಬಾಲಕಿ ತನ್ವಿ ಕೃಷ್ಣ ಬಿಎಂಟಿಸಿ ಬಸ್‌ಗೆ ಬಲಿಯಾದದ್ದು. ಕೋಗಿಲು ಕ್ರಾಸ್‌ನಿಂದ ಮಾರುತಿನಗರಕ್ಕೆ ಹೋಗುತ್ತಿದ್ದಾಗ ನಿನ್ನೆ ಬೆಳಿಗ್ಗೆ ಸುಮಾರು 8 ಗಂಟೆಗೆ ಈ ದುರಂತ ಸಂಭವಿಸಿತು.
ಮಾರುತಿನಗರ ನಿವಾಸಿ ಹರ್ಷಿತಾ ತನ್ನ ಇಬ್ಬರು ಮಕ್ಕಳನ್ನು ಶಾಲೆಗೆ ಬಿಡಲು ಸ್ಕೂಟರ್‌ನಲ್ಲಿ ಹೊರಟಿದ್ದರು. ಆದರೆ ದುರಂತದ ವೇಳೆ ಹರ್ಷಿತಾ ಸವಾರಿಯ ಬೈಕ್‌ಗೆ ಹಿಂಬದಿಯಿಂದ ಬಂದ ಬಿಎಂಟಿಸಿ ಬಸ್ ಟಚ್‌ ಆಗಿದ್ದು, ನಿಯಂತ್ರಣ ಕಳೆದುಕೊಂಡ ತಾಯಿ ಮತ್ತು ಮಕ್ಕಳು ರಸ್ತೆಗೆ ಬಿದ್ದರು. ದುರ್ಭಾಗ್ಯವಶಾತ್, ಹಿಂಬದಿಯಲ್ಲಿ ಬಿದ್ದ 10 ವರ್ಷದ ತನ್ವಿ ಕೃಷ್ಣ ಬಸ್ ಚಕ್ರಗಳ ಕೆಳಗೆ ಸಿಲುಕಿ ಸ್ಥಳದಲ್ಲೇ ಮೃತಪಟ್ಟಳು. ಘಟನೆಯ ದೃಶ್ಯ ಡ್ಯಾಶ್ ಕ್ಯಾಮೆರಾ ಹಾಗೂ ಸಿಸಿಟಿವಿಯಲ್ಲಿ ದಾಖಲಾಗಿದ್ದು, ಮಗಳ ಅಕಾಲಿಕ ಸಾವಿನಿಂದ ತಾಯಿ ಹರ್ಷಿತಾಳ ಆಕ್ರಂದನ ಮುಗಿಲು ಮುಟ್ಟಿತು.
ತನ್ವಿಯ ತಾಯಿ ಮತ್ತು ಸಹೋದರಿಗೆ ಸಣ್ಣಪುಟ್ಟ ಗಾಯಗಳಾದರೂ, ಮಗುವಿನ ಸಾವಿನ ನೋವಿಗೆ ಯಾವ ಪರಿಹಾರವೂ ಇಲ್ಲ. ಸ್ಥಳೀಯರು ಘಟನೆಯನ್ನು ನೋಡಿ ತತ್ತರಿಸಿ ಹೋಗಿದ್ದು, ಸಾರ್ವಜನಿಕರಿಂದ ಬಿಎಂಟಿಸಿ ವಿರುದ್ಧ ಆಕ್ರೋಶ ವ್ಯಕ್ತವಾಗಿದೆ.
ಜನರ ಬೇಡಿಕೆ – ಕಟ್ಟುನಿಟ್ಟಿನ ಕ್ರಮ ಅಗತ್ಯ
ಸಾರಿಗೆ ವ್ಯವಸ್ಥೆಯಲ್ಲಿ ಬಿಎಂಟಿಸಿ ಬಸ್‌ಗಳು ಅನಿವಾರ್ಯವಾದರೂ, ದಿನೇದಿನೇ ಏರುತ್ತಿರುವ ಬಸ್ ಅಪಘಾತಗಳು ಜನರ ಜೀವಕ್ಕೆ ಬೆಲೆ ಕಟ್ಟುತ್ತಿವೆ. ಸಾಮಾನ್ಯ ಜನರು, ಬೈಕ್ ಸವಾರರು, ಪಾದಚಾರಿಗಳು – ಎಲ್ಲರೂ ಬಸ್‌ಗಳಿಗೆ ಬಲಿಯಾಗುತ್ತಿದ್ದಾರೆ. ನಿರ್ಲಕ್ಷ್ಯ ಚಾಲಕರ ವಿರುದ್ಧ ಕಠಿಣ ಕ್ರಮ, ಎಲೆಕ್ಟ್ರಿಕ್ ಬಸ್‌ಗಳ ಸುರಕ್ಷತಾ ಪರಿಶೀಲನೆ ಹಾಗೂ ಚಾಲಕರಿಗೆ ಹೆಚ್ಚುವರಿ ತರಬೇತಿ ನೀಡಬೇಕು ಎಂಬ ಬೇಡಿಕೆಗಳು ಜೋರಾಗಿವೆ.
ನಗರದಲ್ಲಿ ಸಂಚಾರಕ್ಕೆ ಸಹಾಯ ಮಾಡುವ ಬಸ್‌ಗಳೇ, ಜನರ ಜೀವ ಕಸಿಯುವ ಸಾಧನವಾಗಬಾರದು ಎಂದು ನಾಗರಿಕರು ಒತ್ತಾಯಿಸುತ್ತಿದ್ದಾರೆ.
